Dous axentes da Policía Local de Santiago resultaron feridos cando sinalizaban un accidente ocorrido na SC-11, no Castiñeiriño, cando outro coche chocou contra o seu vehículo. O 112 Galicia tivo constancia dos feitos sobre as 3.40 horas da madrugada, a través da chamada da central de emerxencias dun dos vehículos implicados. Ambos os policías necesitaron asistencia sanitaria e foron trasladados ao hospital. Acudiron ao lugar profesionais do 061.
