A presenza dun camión ardendo na calzada na AG-56, na contorna de Santiago, causou retencións no tráfico á primeira hora da mañá, aínda que non se rexistraron danos persoais. Segundo informaron a DGT e o CIAE 112 Galicia, a primeira alerta produciuse sobre as 6.30 horas, a partir dunha chamada do propio condutor do camión (de transporte de leite), que informaba de que tiña unha avaría e que había lume no motor, aínda que el mesmo sufocara as chamas.
Non entanto, o lume reavivouse momentos despois, e sobre as 8.25 horas, procedeuse a cortar o tráfico na AG-56, entre o quilómetro 0 e o quilómetro 5, xa que o camión estaba a arder preto da ligazón coa AP-9, á altura de Bertamiráns. Ao lugar acudiron os bombeiros de Santiago para extinguir as chamas. Unha vez sufocado o lume, foi necesario esperar a un guindastre para a retirada do vehículo calcinado.
A operación, na que tamén participou a Garda Civil de Tráfico, obrigou a cortar totalmente a circulación nese tramo entre a autovía e a autoestrada, polo que se produciron retencións desde primeira hora. Con todo, a Garda Civil informou o restablecemento do tráfico sobre as 9.00 horas.
