O secretario xeral do PSdeG, Xosé Ramón Gómez Besteiro, reiterou este luns que o proceso disciplinario aberto aos edís do PSOE en Santiago de Compostela “está a desenvolverse pola senda que marca o propio partido” e que, por tanto, el “non interfere” no mesmo. A maiores, considerouno “unha cuestión puramente puntual” dentro das “máis de 300 agrupacións” socialistas en Galicia.
A preguntas dos medios tras un acto en Santiago para presentar a súa precandidatura á reelección, Besteiro non quixo analizar o posible acordo entre o bipartito local de Santiago e os socialistas composteláns para aprobar os orzamentos deste ano na capital galega. “Nin o avalamos, nin o deixamos de avalar, é unha cuestión que se debe fundamentar nun ámbito estritamente local”, dixo Gómez Besteiro, quen engadiu que “neste caso” entende que “haberá unha participación tamén do partido respecto diso”.
Finalmente, sobre as declaracións realizadas polo delegado do Goberno na Cadena SER, onde dixo estar a disposición do partido como posible futuro candidato á alcaldía de Santiago, Besteiro asegurou que “queda moito tempo para iso”. “En todo caso, eu valoro positivamente a disposición de todos os militantes, xa sexa en Santiago ou en calquera outra localidade”, engadiu Besteiro, que lembrou que, no entanto, serán “os militantes do PSdeG en Santiago os que decidirán”.
