A Policía Nacional desarticulou unha organización que distribuía cocaína en varios puntos de Galicia. Segundo informou nun comunicado, foron intervidos máis de dous quilos desta sustancia en Santiago de Compostela e hai catro persoas detidas.
Así, axentes da Policía Nacional iniciaron a tarde do día 6 de xaneiro a explotación operativa no marco da operación policial ‘Pantera Rosa Magnun’, que finalizou coa detención de catro membros dunha rede (dous homes e dúas mulleres) por supostos delitos contra a saúde pública, branqueo de capitais e pertenza a organización criminal.
Os dispositivos activados permitiron centrar a investigación nun chanzo superior e identificar a un home, que lideraba e fornecía de cocaína a varios puntos de menudeo do ensanche compostelán e a súa área de influencia, e que frecuentaba periodicamente co mesmo fin outras zonas das provincias da Coruña e Lugo. O investigado, segundo o relato policial, utilizaba moitas medidas de seguridade, trasladándose en vehículo ou en transporte público alternativamente, tentando así evitar ser detectado.
VIXILANCIAS E SEGUIMENTOS
Finalmente, tras múltiples vixilancias e seguimentos durante meses, púidose localizar os lugares onde se presumía que podía ter almacenada a droga, polo que se elaborou un dispositivo no que colaboraron diferentes unidades da Policía Nacional. O día da detención, foi interceptado nun vehículo acompañado por unha muller, tamén detida, onde se lle interveu nun compartimento oculto no motor do vehículo uns 350 gramos de cocaína.
VARIOS PUNTOS
Con este operativo considérase desarticulado esta armazón, que distribuía cocaína en todo a área da capital galega, realizándose na Coruña e Santiago de Compostela un total de cinco rexistros en domicilios, trasteiros e locais. Outras dúas persoas máis son detidas pola venda de sustancias estupefacientes nun domicilio utilizado como punto negro en Santiago, e por facilitar o branqueo das ganancias produto das vendas.
O LÍDER, ENVIADO A PRISIÓN
As investigacións foron realizadas pola Brigada Local de Policía Xudicial, Grupo de Estupefacientes da Comisaría Local de Santiago de Compostela, en investigación conxunta co Grupo de Estupefacientes da Brigada de Policía Xudicial da Comisaría Provincial de Lugo, contando coa colaboración operativa da Brigada de Seguridade Cidadá de Santiago de Compostela. O suposto líder da organización criminal foi enviado a prisión polo Xulgado de Instrución de Garda de Santiago.
