A concelleira do Partido Popular en Compostela, Yolanda Otero, instou á adhesión da capital galega á Rede de Cidades ‘Fast Track’, unha iniciativa global que busca acelerar a resposta fronte ao VIH e as infeccións de transmisión sexual, así como eliminar o estigma asociado antes de 2030.
Segundo explicaron os populares nun comunicado, esta proposta pretende dotar á cidade dunha folla de ruta estratéxica aliñada cos obxectivos marcados pola organización internacional Onusida no seu programa ’95-95-95-95′. Esta iniciativa aspira a que o 95% das persoas afectadas polo VIH coñezan o seu estado serolóxico, sigan un tratamento continuado, supriman así a súa carga viral e gocen dunha alta calidade de vida, erradicando estigmas e discriminación.
Otero destacou a importancia de que o goberno municipal asuma un papel activo neste ámbito: “O papel do goberno local é fundamental para avanzar neste reto común de acabar coa pandemia do VIH”. Nesta liña, o PP de Santiago anima á cidade a converterse nunha referencia local, autonómica e internacional na loita contra a sida e a favor da saúde pública.
A Rede ‘Fast Track’, que xa conta con numerosos concellos adheridos a nivel internacional, promove o traballo coordinado entre administracións e axentes locais para desenvolver medidas efectivas, desde campañas de prevención ata iniciativas de apoio social para as persoas afectadas.
COMPROMISO PARA O 2030
A proposta inclúe o deseño e implementación de programas que fomenten a detección precoz, a continuidade dos tratamentos e a eliminación do estigma asociado ao VIH, co obxectivo de alcanzar os compromisos marcados no horizonte 2030. O Partido Popular local confía en que esta adhesión sitúe a Compostela como un referente de boas prácticas no ámbito da saúde pública e os dereitos sociais.
