A agrupación municipal do PSdeG de Compostela apoia tamén a reclamación de que se modifique o trazado da senda ciclista a Milladoiro para evitar o seu paso polo Banquete de Conxo, unha proposta que tamén mantivo o goberno local. A Xunta de Galicia pretende levar a cabo a construción dunha senda ciclista que una OMilladoiro con San Caetano e que, para iso, atravese o bosque do Banquete de Conxo, unha zona de “especial protección ambiental”, din os socialistas.
Por este motivo, argumentan, o PSdeG situouse desde un inicio en contra do proxecto, para o que “xa presentaran alegacións ao proxecto en febreiro de 2023”.
A concelleira Mercedes Rosón foi “moi crítica” co BNG de Compostela, posto que, aínda que desde o grupo socialista “acollen de agrado que mova ficha”, foi despois “meses de silencio cómplice”. Así mesmo, os socialistas trasladaron en nota de prensa que a súa intención é seguir defendendo que “se modifique o itinerario” facendo que este pase por zona urbana e “permita que sexa máis funcional”.
