O Concello de Santiago de Compostela continúa o desenvolvemento de importantes intervencións no espazo público co obxectivo de mellorar a accesibilidade e a calidade urbana da cidade. O concelleiro de Vías e Obras, Xesús Domínguez, informou en rolda de prensa sobre o estado actual das obras en curso e avanzou detalles de novos proxectos previstos para o próximo ano.
Domínguez destacou que a obra de reurbanización do Pombal avanza “a bo ritmo”. Segundo indicou, nos últimos días se hormigonou un novo tramo da calzada, que se atopa xa no segundo terzo, e proximamente comezará o proceso de forxado. Ademais, a execución das beirarrúas e das acometidas ás vivendas está na fase final, o que garante que os traballos rematen no prazo previsto.
O edil expresou a súa satisfacción polo avance desta intervención, subliñando “non só a calidade material da execución, senón tamén a atención ás necesidades de mobilidade e acceso dos veciños e locais afectados”.
NOVAS ACTUACIÓNS: GARCÍA LORCA E PUENTE LA REINA
Respecto á rehabilitación da rúa de García Lorca, Domínguez explicou que a obra está en fase de contratación cun orzamento base de licitación de preto de 1,2 millóns de euros. O proxecto busca mellorar a accesibilidade e a calidade do espazo urbano mediante percorridos peonís máis amplos, a recolocación de elementos que dificultan o tránsito e a renovación de pavimentos.
Por outra banda, tamén se anunciou a contratación das obras de reurbanización da rúa de Puente la Reina, cun investimento estimado de 500.000 euros.
O concelleiro fixo un balance positivo da campaña de asfaltados de 2024, que contou cun orzamento de 358.535,10 euros e permitiu rexenerar o pavimento de varias rúas. Para o próximo ano, o proxecto de rehabilitación de firmes disporá de 460.004,08 euros e abarcará unha superficie de 23.360 metros cadrados. Está previsto que os traballos comecen cando melloren as condicións meteorolóxicas.
