O conselleiro de Educación, Ciencia, Universidades e Formación Profesional, Román Rodríguez, e a presidenta do Consello Superior de Investigacións Científicas (CSIC), Eloísa del Pino, reuníronse este pasado xoves para reforzar a cooperación entre o organismo estatal e a Xunta de Galicia. Durante o encontro, abordaron o impulso ao Centro de Supercomputación de Galicia (Cesga) e discutiron proxectos conxuntos para ampliar a proxección internacional desta entidade científica.
Esta foi a primeira reunión entre Rodríguez e Del Pino tras a asunción das competencias de Ciencia por parte do conselleiro galego. Rodríguez, acompañado pola directora da Axencia Galega de Innovación (Gain), Carmen Cotelo, destacou a importancia de traballar conxuntamente entre administracións para alcanzar “grandes resultados”.
“A colaboración entre Xunta e CSIC é fundamental para promover unha ciencia e investigación de excelencia“, afirmou o conselleiro, quen subliñou o compromiso do Goberno galego coa I+D+i, materializado en investimentos de máis de 28 millóns de euros destinados a centros do CSIC en Galicia. Estes fondos apoian programas como axudas a investigadores excelentes (ERC), grupos de referencia e contratos predoutorais e posdoutorais para atraer e reter talento na comunidade.
O Cesga, dependente tanto da Xunta como do CSIC, foi un dos puntos centrais do encontro. Actualmente, esta infraestrutura presta servizo a numerosos centros do CSIC, como o Instituto de Física Teórica e o Instituto de Ciencia de Materiais, e conta con 344 contas de usuario activas para proxectos científicos. A colaboración entre ambas as entidades propiciou 209 publicacións científicas baseadas en investigacións realizadas con recursos do Cesga.
Rodríguez anunciou que a Xunta construirá unha nova sede do Cesga no polígono da Sionlla en Santiago de Compostela, cun investimento de 56 millóns de euros, o maior da súa historia. Este proxecto busca ampliar as capacidades do centro e prevese que estea completado en 2026.
Ademais de valorar as colaboracións actuais, Rodríguez e Del Pino exploraron novos proxectos estratéxicos para o Cesga e a comunidade científica galega. “O potencial do Cesga pode ser aínda máis aproveitado, beneficiando tanto a Galicia como á relevancia nacional e internacional da investigación galega”, apuntou o conselleiro.
