A alcaldesa de Santiago, Goretti Sanmartín, asegurou que os orzamentos da Xunta, que pasan este martes polo pleno do Parlamento de Galicia, “non teñen en conta” as “necesidades históricas” de Santiago de Compostela.
Ante as preguntas dos medios nunha rolda de prensa celebrada este martes en Santiago, Sanmartín sinalou que “levan moito tempo” falando destas necesidades e lamentou o “nulo” investimento en espazos ou equipamentos deportivos.
“Creo que hai unha estimación orzamentaria para Santiago que non está á altura do que Compostela merece, iso leva sendo así nos últimos tempos e infelizmente vemos que neste caso os orzamentos do PP continúan nesa mesma tónica”, aseverou.
Neste contexto, fixo referencia á chamada “taxa turística” e lamentou que se trate unha “recarga municipal” que van ter que xestionar os concellos e non dun imposto por estancias turísticas. Con todo, asegurou que o Concello de Santiago “porase a traballar” en canto teñan “un texto de referencia”.
Por outra banda, referiuse tamén aos orzamentos municipais e indicou que “está a haber negociacións”, así mesmo, asegurou que estas avanzan “de maneira adecuada” pero “non tan rápido como algúns quererían”. En referencia á situación do PSOE compostelán, advertiu de que “non vai falar” sobre procedementos internos doutras organizacións.
