A titular do xulgado do penal número 2 de Santiago admitiu a trámite os 60 recursos presentados contra a sentenza do accidente do tren Alvia, que condenou ao ex director de seguridade de Adif e ao maquinista por 79 homicidios imprudentes. En concreto, recorreron 52 representantes das vítimas, unha das asociacións de prexudicados, a Fiscalía, Adif, Renfe, as dúas aseguradoras (Allianz Global e QBE) e os dous condenados, segundo informa o Tribunal Superior de Xustiza de Galicia (TSXG).
A maxistrada emitiu este martes unha providencia na que admitiu a trámite os 60 recursos interpostos contra a sentenza que ditou o pasado 26 de xullo, na que condenou a dous anos e seis meses de cárcere ao maquinista do tren Alvia que descarrilou na curva de Angrois o 24 de xullo de 2013 e ao que foi director de Seguridade na Circulación do Administrador de Infraestruturas Ferroviarias (Adif) no momento da posta en funcionamento da liña pola comisión de 79 delitos de homicidio e 143 delitos de lesións por imprudencia grave.
Ademais, inhabilitounos para o exercicio das súas profesións durante catro anos e medio; e impúxolles o pago dunha indemnización, con responsabilidade civil directa das entidades QBE e Allianz Global, aseguradoras, respectivamente, de Renfe Operadora e Adif, de máis de 25 millóns de euros ás vítimas. Dos 60 recursos de apelación, a maioría (52) foron presentados polos representantes das vítimas ou dos seus familiares, case todos en relación á parte civil da sentenza.
Tamén interpuxo recurso contra o fallo a Asociación de Prexudicados polo Accidente Ferroviario do Alvia de Santiago de Compostela (Apafas), así como o Ministerio Fiscal, Adif, Renfe, as dúas entidades aseguradoras (Allianz Global e QBE) e os dous condenados. Na providencia, a titular do Xulgado do Penal número 2 de Santiago de Compostela concede ás partes un prazo de trinta días hábiles para contestar os recursos que lles interesen, os cales serán resoltos pola sección sexta da Audiencia Provincial da Coruña, con sede en Santiago.
