O acendido oficial das luces de Nadal en Santiago de Compostela tivo lugar este venres, 29 de novembro, ás 19:00 horas, marcando o inicio das festividades na cidade. A alcaldesa, acompañada por membros da Corporación municipal, participou no acto central celebrado na Praza do Obradoiro, onde veciños e visitantes desfrutaron dun amplo programa de actividades.
As luces de Nadal iluminan un total de 129 rúas e prazas da cidade, así como as 23 parroquias do rural compostelán, creando un ambiente festivo que se estenderá ata o 5 de xaneiro.
UN EVENTO CON MÚSICA E ESPECTÁCULOS VISUAIS
O acendido comezou coas luces do Mercado de Nadal, situado na Carreira do Conde, que permanecerá aberto durante toda a tempada festiva. A xornada estivo animada polas actuacións de Cantigas e Agarimos e Brincadeira, que percorreron as rúas coa súa música tradicional.
Na Praza do Obradoiro, a veciñanza foi sorprendida por un espectáculo visual con figuras xigantes, estrelas andantes e un monicreque iluminado a cargo da compañía Pablo Méndez. A celebración contou tamén coa interpretación da soprano Esperanza Mara e a música de DJ Mil, que pecharon o acto co acendido final das luces na emblemática praza.
UNHA APOSTA POLO NADA EL COMPOSTELA
O programa de Nadal en Santiago aposta por combinar tradición, modernidade e participación cidadá, convertendo a cidade nun espazo de encontro para celebrar as festas. O alumeado, que inclúe diferentes motivos decorativos e figuras luminosas, busca reforzar o atractivo da cidade durante esta época.
Con actividades previstas ata principios de xaneiro, o Nadal en Compostela promete ofrecer unha experiencia única tanto para os residentes como para os visitantes.
Ver esta publicación en Instagram
