O concelleiro de Urbanismo e Vivenda, Iago Lestegás, anunciou o levantamento parcial da suspensión de licenzas na cidade histórica para permitir novos usos residenciais en plantas baixas. Trátase dun levantamento que só afectará a un ámbito determinado e ao cambio de uso terciario a uso residencial. Así o explicou nunha rolda de prensa celebrada este xoves en Santiago, onde lembrou que o pasado 17 de xuño, o goberno local acordou unha suspensión previa que afectaba a “a implantación de novos usos residenciais na planta baixa en locais onde se estaban desenvolvendo outros usos”.
Deste xeito, a suspensión pretendía protexer ao tecido comercial da cidade en espazos da cidade histórica onde este uso é “predominante”. Con todo, asegurou que despois de varios meses nos que realizaron traballos de análises e diagnóstico, xa están nunha fase que “permite levantar parcialmente” a suspensión. “Consideramos que é necesario preservar o uso comercial das plantas baixas nos espazos da cidade histórica onde ese uso é predominante, pero non vemos inconveniente en autorizar a implantación de novos usos residenciais en planta baixa en locais onde antes de desenvolvían outros usos en zonas onde xa predomina o uso residencial en baixos”, subliñou.
Deste xeito, anunciou que os espazos da cidade onde prevalecerá o uso terciario en baixos se clafisicarán en seis eixos: Galeras-San Clemente, Avenida da Coruña-Avenida de Figueroa, Carreira do Conde-Porta do Camiño, Cruz de San Pedro-Acibecharía, Porta Faxeira-San Francisco e Basquiños-Cervantes. Ademais doutro ámbito onde se concentra a actividade terciaria da cidade histórica e que coincide “co cuadrante sueste do antigo recinto intramuros”. Nesta liña, Lestegás incidiu en que o goberno local aposta por “un comercio de proximidade que garante o abastecemento dos veciños sen necesidade de grandes desprazamentos”.
REXISTRO DE SOLARES
Por outra banda, o concelleiro de Vivenda aproveitou para lembrar que se ordenou a inclusión no Rexistro de solares de catro inmobles con declaración de ruína situados na Rúa de San Roque 23, en Praciña das Penas 5, Rúa dos Loureiros 14 e na Rúa do Espírito Santo 33. Con todo, sinalou que tres dos catro inmobles (San Roque 23, Praciña das Penas 5 e Loureiros 14) pertencen á mesma comunidade de herdeiros e anunciou que proximamente sairán a poxa pública todos os inmobles mencionados.
