O goberno de Santiago alertou de que se detectou en redes sociais un intento de estafa para o que se usa, mediante un perfil falso de ‘Facebook’, a imaxe de Tussa, a empresa de transporte municipal.
A través desta páxina fraudulenta, ofrécese un cartón con supostos beneficios para viaxes ilimitadas nos autobuses da cidade por só 2,35 euros durante seis meses, como parte dun aniversario da empresa.
A web insta mesmo a “apresurarse” co gancho de que “só hai dispoñibles 500 cartóns” a ese prezo.
O goberno local alertou do intento de estafa en redes e insta a non abrir o link, non proporcionar datos persoais e non difundir.
Así mesmo, fontes municipais confirmaron que o caso se denunciou ante a Policía Nacional e que Santiago non é a primeira cidade na que se rexistra un intento de estafa deste tipo.
