O BNG emitiu un comunicado este venres a través da rede social X en resposta ao dano sufrido por un dos seus carteis contra a manipulación dos medios públicos, situado no cruce entre a rúa Xeneral Pardiñas e República del Salvador en Santiago. Nunha imaxe difundida polo propio partido, vese o mupi coa súa publicidade desaparecida e restos de cristal no chan, o que, segundo os nacionalistas, “non deterá” a súa campaña.
No comunicado, o BNG declara que continuará coa súa denuncia tanto “nas rúas como nas redes” para reclamar unha CRTVG ao servizo da sociedade galega e “sen manipulación política”, sinalando que as súas accións están tamén orientadas á defensa da liberdade e independencia profesional das e dos xornalistas.
Entre os obxectivos desta campaña, que inclúe carteis e mensaxes en redes sociais, o BNG apunta á necesidade de garantir uns medios públicos que representen a pluralidade da sociedade galega e non respondan, en palabras do partido, “a intereses partidistas”. O partido asegura que manterá a súa presión para denunciar o que considera unha inxerencia política nos medios públicos e defende a CRTVG como “un servizo público independente ao servizo de Galicia”.
