O edificio CINC da Cidade da Cultura de Santiago de Compostela acollerá este xoves 7 de novembro a 22ª edición de GaliciaTIC, o foro de referencia no ámbito das tecnoloxías da información e a comunicación en Galicia, organizado pola Asociación de Empresas de Tecnoloxía de Galicia (INEO). A xornada será inaugurada pola conselleira de Economía e Industria, María Jesús Lorenzana, e contará coa participación de máis de 30 expertos que abordarán temas de relevancia para o sector TIC, cunha especial atención á Intelixencia Artificial e á investigación sostible en tecnoloxía.
Entre as intervencións destacadas figura a de Ignasi Belda, director da Axencia Española de Supervisión da Intelixencia Artificial (AESIA), quen analizará os retos na regulación da IA e ofrecerá unha panorámica sobre o regulamento europeo recentemente aprobado. Amais, o experto José Ramón Monleón presentará os principais riscos asociados á IA e as medidas para mitigalos, centrándose nos aspectos éticos e de seguridade.
A Asociación para o Progreso da Dirección (APD) tamén colaborará no evento, organizando unha mesa de debate sobre o impacto da IA nas empresas, co fin de abrir o foro a outros sectores interesados en coñecer as últimas novidades en tecnoloxía.
O programa inclúe tamén sesións sobre o desenvolvemento sostible en TI, combinando tecnoloxías para potenciar resultados, así como mesas temáticas sobre as oportunidades e desafíos que presenta a democratización da IA. Outras cuestións de interese para o sector, como a conexión entre talento e tecnoloxía, a análise do mercado laboral e a capacitación en TIC na comunidade galega, serán abordadas como parte dos retos estratéxicos para Galicia.
GaliciaTIC acollerá, ademais, unha feira de emprego onde estudantes de carreiras tecnolóxicas poderán coñecer as principais empresas do sector, nun evento que conectará a nova xeración de profesionais coas empresas TIC, que representan preto do 3 % do PIB galego.
Na sesión da tarde, un enxeñeiro de software ofrecerá unha charla dirixida a novos emprendedores, titulada ’14 consellos de senior que lle daría ao meu eu júnior’, con orientacións prácticas para quen inician o seu camiño no ámbito TIC.
CONSOLIDACIÓN DO FORO
A presidenta de INEO, Lourdes Guerra Fornos, destacou que “acadar a 22ª edición é un fito ao alcance de poucas organizacións”. A continuidade de GaliciaTIC, que se mantivo incluso durante a pandemia, demostra que o evento aborda temas de interese e responde ás necesidades dun sector en constante evolución.
Pola súa banda, o subdirector xeral de APD, Santiago Sesto, sinalou que “a colaboración neste encontro é esencial para a creación de sinerxías empresariais e para fomentar o desenvolvemento directivo e o coñecemento compartido, convertendo a GaliciaTIC nunha cita imprescindible para as empresas e a sociedade galega”.
