Os Bombeiros rescataron a unha persoa que quedara atrapada no interior dunha vivenda afectada por un incendio en Santiago de Compostela. Segundo a información do CIAE 112-Galicia, o suceso ocorreu ás 17.30 horas na rúa San Pedro de Mezonzo. Foron uns veciños os que deron a voz de alarma, tras ver saír unha importante cantidade de fume da vivenda, na que residían persoas maiores.
Ata a zona desprazáronse efectivos da Policía Nacional e local, así como dos Bombeiros de Santiago, que rescataron a unha persoa, única ocupante neses momentos da vivenda. Despois, foi trasladada polo 061 ao Clínico de Santiago con síntomas compatibles cunha intoxicación por inhalación de fume. Ademais, o edificio, composto por sete plantas, foi desaloxado de maneira preventiva mentres duraron os traballos de extinción e debido ao intenso fume acumulado nas zonas comúns.
