A Xunta de Goberno de Santiago de Compostela aprobou este luns a adxudicación do contrato mixto da iluminación de Nadal 2024 á empresa Iluminacións Santiaguesas, que presentou unha proposición económica de 263.780 euros.
Así o confirmou este luns en rolda de prensa a edil Pilar Lueiro, que apuntou que a iluminación do Nadal será “na liña” do do ano pasado, pero con máis arcos e elementos lumínicos en certos puntos da cidade. Esta cantidade supón un incremento no investimento para a iluminación do Nadal con respecto ao ano pasado, cando se destinaron ao contrato 214.000 euros.
Por outra, parte, o programa municipal de conciliación de Nadal desenvolverase entre o día 23 de decembro e o 7 de xaneiro, nas instalacións do CEIP Quiroga Palacios e Monte dos Postes e as familias interesadas poderán presentar a súa solicitude desde este martes, 29 de outubro, e ata o próximo 4 de novembro. Tamén abre este luns o prazo de solicitude para participar no programa de conciliación VacaLudos no Espazo María Miramontes.
O programa de conciliación de Nadal é unha iniciativa municipal dirixida a nenos e nenas empadroados no Concello de Santiago ou que cursen estudos en centros de educación infantil e primaria da cidade (entre o 2º ciclo de educación infantil e o 3º ciclo de educación primaria) con idades comprendidas entre os 3 e os 12 anos, concibido como un espazo educativo, de promoción do lecer e o tempo de lecer, ademais dun recurso para a conciliación familiar e laboral no tempo de vacacións
A oferta de actividades para esta edición desenvolverase durante o período de vacacións escolares: os días 23, 24, 26, 27, 30 e 31 de decembro de 2024 e o 2, 3, e 7 de xaneiro de 2025. O horario será de 9,00 a 14,00 horas, con posibilidade de ampliar o horario co servizo de madrugadores con almorzo (de 7,45 a 9,00 horas) e o servizo de comedor (de 14,00 a 16,00 horas).
