A alcaldesa de Santiago, Goretti Sanmartín, espera que “deica pouco tempo” a Xunta dea luz verde á autorización das 29 licenzas de taxi e Raxoi xa ten “todo preparado” para que eses permisos comecen a funcionar.
“Entendo que a poboación de Santiago sabe que son unha necesidade, que todo o mundo ten que ter ese servizo, con esa accesibilidade. Esas 29 licenzas teñen que porse en marcha e nós esperamos que, deica pouco tempo, poida ser unha realidade a autorización da Xunta para podelas facer efectivas”, explicou, a preguntas do medios, a rexedora compostelá tras a ofrenda floral a García Lorca ante a súa estatua na Alameda da capital galega.
Sobre as sancións aos taxistas tras detectar incumprimentos nos taxis, Sanmartín puntualizou en que “como é lóxico” o servizo de taxis ten que cubrir o conxunto de territorio.
“O que non pode ser”, continuou, é que este tipo de transporte estea “unicamente nun lugar”. Por iso, fixo un chamamento a que “se cumpran as quendas” para que todo estea cuberto.
CREACIÓN VIVENDAS XOÁN XXIII
Noutra orde de asuntos, a alcaldesa fixo unha “valoración positiva” do anuncio da Xunta para a creación de vivendas na parcela de Xoán XXIII, tendo en conta que esa “foi unha das cuestións” que Raxoi comentou á conselleira de Vivenda nunha reunión.
“Que a Xunta cambiase de posición e que nestes momentos poida haber vivendas para os mozos, parécenos que é moi importante porque debe estar instalada a mocidade en pleno centro”, asegurou Goretti Sanmartín.
Así mesmo, advertiu de que “estarán pendentes” de que esas vivendas cumpran “as condicións dignas e de calidade que deben ser” e insistiu en que é “unha noticia positiva” e “o único que poden dicir como pega” é que chegue con “15 anos de atraso”.
