A Facultade de Filosofía da Universidade de Santiago de Compostela (USC) acollerá o próximo mércores, 30 de outubro, unha xornada titulada ‘Miradas complementarias. Unha análise multidisciplinar do conflito palestino-israelí en Oriente Próximo’, organizada en colaboración coa Fundación Araguaney-Puente de Culturas. O evento, que comezará ás 17.00 horas, abordará o conflito desde perspectivas filosóficas, históricas, políticas e antropolóxicas, e será de acceso libre ata completar aforo. A xornada tamén se poderá seguir en liña.
A sesión está estruturada en dúas mesas redondas. A primeira, baixo o título ‘As pezas do conflito. Elementos históricos, sociopolíticos e ético-filosóficos’, contará coa participación de expertos como o profesor de Historia Contemporánea Antonio Míguez Macho, o politólogo Antón Losada e o filósofo Luís García Soto, todos eles da USC. O debate será moderado por Jesús Núñez Villaverde, co-director do Instituto de Estudos sobre Conflitos e Axuda Humanitaria.
A segunda mesa redonda, titulada ‘A loita pola causa palestina dende a sociedade civil organizada e o activismo’, terá lugar a partir das 18.45 horas. Estará moderada pola profesora de Antropoloxía Social da USC Guadalupe Jiménez Esquinas, e contará co empresario e presidente de honra da Fundación Araguaney Ghaleb Jaber Ibrahim, a doutora en Comunicación e Conflito Leila Nachawati, e a activista Sara Ashour, representante da Asociación Galaico Árabe Jenín.
Esta iniciativa enmárcase dentro do acordo entre a USC e a Fundación Araguaney, que promove a reflexión intercultural entre Galicia e o mundo árabe, e busca ofrecer novas perspectivas para entender mellor os aspectos sociopolíticos e culturais deste conflito.
