O delegado do Goberno en Galicia, Pedro Blanco, e o alcalde de Boqueixón, Ovidio Rodeiro Tato, anunciaron hoxe avances importantes na habilitación dunha rotonda na estrada N-525 ao seu paso por Lestedo. O proxecto busca mellorar a seguridade viaria nun punto crítico, onde a intersección coa estrada provincial C-1202 e a vía municipal que conduce ao campo de fútbol e ao Pico Sacro leva anos xerando problemas de tráfico.
Durante unha reunión celebrada na Delegación do Goberno, na que tamén participaron a subdelegada do Goberno na Coruña, María Rivas, e o xefe da Demarcación de Estradas de Galicia, Ángel González del Río, presentouse o proxecto orzamentado en 250.000 euros, pendente de información pública.
O alcalde de Boqueixón, Ovidio Rodeiro, explicou que esta rotonda é unha demanda histórica do Concello para facilitar os movementos de tráfico e reducir a velocidade na zona, o que eliminaría a necesidade dun semáforo, tamén solicitado previamente polo Concello. “Con este proxecto solucionaranse os problemas que afectan tanto aos veciños de Milleirós e Vilar, como aos visitantes do Pico Sacro”, afirmou Rodeiro.
Ademais, abordouse o posible traspaso da antiga casa de peóns camineros en Sergude ao Concello de Boqueixón, un inmoble actualmente en trámites para a súa desafectación.
