Fillas de Cassandra actuarán o vindeiro xoves 7 de novembro nun concerto gratuíto en Santiago. A actuación será na compostelá Sala Capitol a partir das 21.00 horas e estará dirixido aos mozos de entre 16 e 30 anos (os menores de 18 deberán ir acompañados) que estuden, traballen ou estean empadroados na cidade.
Segundo explicou este martes nunha rolda de prensa a concelleira de Dereitos Sociais, Promoción Económica e Xuventude, María Rozas, esta iniciativa cultural xorde por mor dos Orzamentos Participativos da área de Mocidade do Concello de Santiago, nos que diversos mozos votaron iniciativas para desenvolvelas na cidade.
Deste xeito, a segunda iniciativa máis votada, era a celebración dun concerto cun grupo ou artista “referente” na escena musical actual. Neste sentido, Rozas cualificou a Fillas de Cassandra de “referentes na escena musical galega” e aplaudiu o seu “inmenso labor” para “normalizar” o uso do galego.
REQUISITOS
Durante a rolda de prensa, na que tamén participou unha das integrantes do grupo, Sara Faro, a concelleira explicou que este concerto ten certas “singularidades”. Xa que se trata dun evento gratuíto, pero ao que só poderán acceder aquelas persoas que teñan entre 16 e 30 anos que traballen, estuden ou estean empadroadas en Santiago e que poidan acreditalo.
Con todo, as persoas de 16 anos (que podían participar nos Orzamentos Participativos) poderán acceder ao concerto pero só se van acompañados polo seu proxenitor ou titor legal. Deste xeito, os interesados en acudir ao concerto deberán acudir ata o Centro Sociocultural do Ensanche os días 5 e 6 de novembro para retirar as entradas, e só poderán adquirir unha por persoa.
