A partir do xoves 24 de outubro, a Cidade da Cultura de Santiago acollerá a exposición ‘Tattoo. Arte baixo a pel’, un proxecto impulsado pola Xunta de Galicia e o Musée du quai Branly-Jacques Chirac de Francia, en colaboración coa Fundación La Caixa. A mostra exhibirá o traballo dalgúns dos mellores artistas da tatuaxe contemporánea, nun formato innovador que mestura arte e tecnoloxía.
A exposición contará con modelos de silicona hiperrealistas, tatuados por mestres como Horiyoshi III, referente da tatuaxe tradicional xaponesa, e Filip Leu, un dos tatuadores máis influentes do mundo. Ademais, incluirá obras de artistas pioneiros na introdución de cores no estilo hiperrealista. As pezas foron realizadas por empresas especializadas en maquillaxe e réplicas cinematográficas.
Esta colección única inclúe máis de 240 obras históricas e contemporáneas de 18 países, e está comisariada por Anne Richard, recoñecida axente cultural e fundadora da revista ‘HEY! Modern Arte & Pop Culture’. A mostra promete ser unha das máis completas realizadas ata o momento sobre a arte da tatuaxe a nivel internacional.
