O Grupo HM Hospitales e a S.D. Compostela renovaron o seu acordo de colaboración por unha tempada máis, consolidando unha relación que comezou hai once anos. A través deste convenio, HM Hospitales será responsable dos recoñecementos médicos e da cobertura sanitaria dos xogadores e corpo técnico do club durante a tempada 2024-2025.
Durante o acto de sinatura celebrado no Hospital HM Rosaleda, o director médico de HM Hospitales en Santiago de Compostela, Dr. Pablo Asensio, subliñou o compromiso da institución co deporte galego e co coidado da saúde dos deportistas: “Estamos firmemente comprometidos co coidado dos nosos pacientes e co fomento dun estilo de vida saudable, sendo o deporte unha parte fundamental para o benestar das persoas”.
Pola súa banda, o xerente da S.D. Compostela, Miguel Fernández, expresou o orgullo do club por contar co apoio de HM Hospitales: “Sabemos que os nosos xogadores están en boas mans e que contan coa mellor atención médica e tecnolóxica”.
O convenio con S.D. Compostela súmase a outros acordos que HM Hospitales mantén co Monbus Obradoiro, reforzando a súa aposta polo deporte local en Santiago de Compostela.
