O concelleiro de Mobilidade de Santiago, Xan Duro, anunciou este luns que o goberno local prevé remitir á Xunta de Galicia un novo anexo ao informe sobre o servizo de taxis na cidade. Segundo indicou en rolda de prensa, este informe estará listo ‘esta semana ou a principios da que vén’ e incluirá os datos adicionais solicitados pola Xunta, como cifras de fluxo turístico, estudantil e de actividade laboral.
Duro subliñou que, unha vez entregado o informe actualizado, a responsabilidade estará novamente en mans da administración autonómica. “Se a decisión fose do concello, xa estaba a funcionar o novo sistema”, afirmou, facendo referencia á demora provocada pola necesidade de achegar máis información.
Pola súa banda, a portavoz municipal lamentou a demora na posta en marcha de medidas necesarias para a cidade por mor de “máis e máis informes”. Destacou que, a pesar dos constantes envíos de datos, o Concello espera que a Xunta actúe con dilixencia en cuestións tan relevantes como esta.
TAXA TURÍSTICA E CONTROL DE FLUXOS
En relación ás críticas da Unión Hoteleira sobre o feito de que o imposto por estancia non afecte os excursionistas, a portavoz do goberno local defendeu que o obxectivo da taxa non é reducir o número de turistas, senón utilizar os recursos recadados para promover un turismo máis consciente e mellorar a experiencia dos visitantes. Ademais, indicou que o Concello xa está a traballar no control dos fluxos turísticos mediante a instalación de sensores en puntos clave da cidade, o que permitirá analizar o movemento dos visitantes e tomar decisións futuras neste ámbito.
“Temos que diferenciar entre o imposto sobre estancias, o movemento de fluxos e a taxa a excursionistas”, puntualizou a portavoz municipal.
