Axentes da Policía Nacional detiveron no aeroporto Rosalía de Castro de Santiago de Compostela a dúas persoas como supostos autores dun delito de falsidade documental. Segundo informaron fontes policiais, os dous sospeitosos, cidadáns de orixe albanesa, foron detectados no posto fronteirizo por axentes da Brigada Local de Estranxeiría e Fronteiras da Comisaría de Santiago.
Así, ambos tentaban tomar un avión con destino a Dublín (Irlanda), utilizando pasaportes falsos, que adquiriran, para facerse pasar por cidadáns de Grecia. Eses documentos permitiríanlles moverse libremente polo espazo Schengen sen ningún tipo de restrición, pero os axentes detectaron que se trataba de documentación falsa e procederon á súa detención. Os arrestados foron postos a disposición do xulgado de instrución de garda de Santiago de Compostela.
