A Xunta lanzou unha audioguía para dispositivos móbiles destinada a facer máis accesible a visita ás exposicións do Museo Gaiás, tamén para as persoas con dificultade auditiva, ao incorporar explicacións en lingua de signos.

Segundo detallou o Executivo galego, a aplicación está dispoñible polo momento para a mostra ‘Unha vida viquinga’ e inclúe tamén audio e texto en tres idiomas. A aplicación aproveita a funcionalidade de xeolocalización dos dispositivos móbiles determinando en que punto da sala está a persoa visitante.

En función disto, mostra información sobre algunhas das pezas arqueolóxicas que se exhiben e dos puntos de interese máis próximos, para poder gozar dunha visita máis completa. Desta forma, a ferramenta está dispoñible a través do repositorio web de aplicacións móbiles da Xunta, e das principais plataformas de descarga de aplicacións.