A capital de Galicia prepárase para acoller, entre os días 19 e 24 de outubro, á elite científica en Intelixencia Artificial IA), segundo informou a Universidade de Santiago de Compostela (USC). A celebración da European Conference on Artificial Intelligence (ECAI 2024) (o congreso máis importante de Europa no ámbito, e un dos tres de referencia no mundo) converterá Compostela en capital mundial da IA. A USC informou de que o evento conta xa con máis de 1.600 persoas rexistradas.
En paralelo aos labores de coordinación como institución responsable deste encontro, o Centro Singular de Investigación en Tecnoloxías Intelixentes da USC (CiTIUS) programou a ‘Semana da cidadanIA’, unha serie de encontros abertos co obxectivo de aproveitar “a oportunidade histórica desta conferencia para achegar a IA ao público xeral”. As actividades darán inicio o vindeiro luns e estarán distribuídas por distintos puntos da cidade, sendo de carácter gratuíto e abertas ata completar aforamento, sen necesidade de inscrición previa.
