Esta mañá, o auditorio da Casa da Cultura do Milladoiro acolleu a presentación do XIX Festival Internacional de Maxia de Ames (FestiMax), que se celebrará os días 25, 26 e 27 de outubro nas Casas da Cultura de Bertamiráns e do Milladoiro. O evento, organizado polo Concello de Ames en colaboración coa Deputación da Coruña, contará con espectáculos, obradoiros e novidades como sesións de maxia para bebés e maiores.
O concelleiro de Cultura e alcalde de Ames, Blas García, destacou a longa traxectoria do FestiMax, sinalando que “a súa vixésima edición debe ser un referente, xa que non é habitual que iniciativas deste tipo duren tanto no tempo”. Pola súa parte, o mago e produtor Dani Polo, director do festival, destacou a presenza de artistas nacionais e internacionais, que farán de Ames a “capital mundial da maxia” durante esa fin de semana.
Entre as actividades do festival destacan a maxia para maiores con Dani Polo, o espectáculo para bebés do Mago Paco, así como obradoiros de maxia para nenos e nenas. A programación culminará coa Gala Máxica Internacional, que contará coa participación de ilusionistas como Nacho Samena, Ramó & Alegría, Bruno Tarnecci e Néstor Hato.
As entradas e convites xa están dispoñibles na Billeteira electrónica. Para máis información pódese contactar cos números de teléfono 981 535 940 ou 662 377 444.
