Este martes comezou en Santiago de Compostela o congreso Energy Days, inaugurado polo presidente do Clúster de Enerxías Renovables de Galicia (Cluergal), José Ramón Franco, e o director xeral de Planificación Enerxética e Minas da Xunta, Pablo Fernández Vila. O evento, que se celebra na Cidade da Cultura ata o 10 de outubro, nace co obxectivo de ser “o gran punto de encontro do sector enerxético no noreste peninsular”, segundo indicou Franco.
O congreso busca promover o debate sobre a transición enerxética e a dixitalización, dous factores que, en palabras de Franco, están a transformar a sociedade e a industria. Pola súa parte, Pablo Fernández Vila destacou a importancia de apostar polas enerxías renovables en Galicia, aproveitando os seus recursos naturais para reducir a dependencia enerxética exterior. Tamén mencionou a nova Lei de promoción dos beneficios sociais e económicos dos proxectos de enerxías renovables, que busca que os recursos naturais de Galicia beneficien directamente á cidadanía.
A xornada inclúe tres mesas de debate, nas que se trataron temas como a eficiencia enerxética na industria, a regulación dos Certificados de Aforro Enerxético e o papel das comunidades enerxéticas industriais. Entre os participantes, Silvia Fernández presentou as tendencias en sistemas HVAC, mentres que Luis Pita, de Repsol A Coruña, expuxo o papel da eficiencia enerxética na transformación da refinaría cara ás cero emisións netas para 2050.
Mañá mércores, o congreso continuará con sesións sobre combustibles sostibles e almacenamento de hidróxeno, así como a inauguración do congreso Enerdixital, que abordará a transición enerxética e a súa relación coa tecnoloxía.
