O club de atletismo MillaRaio pecha a tempada de aire libre con importantes éxitos, destacando a participación do seu equipo sub14 feminino no campionato de España sub14 por equipos, que se celebrará os días 12 e 13 de outubro en Alcobendas. O club amiense logrou, por novena vez, clasificar un equipo para esta cita nacional, onde competirán contra outros trinta clubes de todo o país.
O equipo que representará ao MillaRaio estará composto por nove atletas: Lucía Buján, Adriana Fernández, Claudia Vila, Helena Guillén, Martina Centenera, Vera Martínez e Sara Barreiro do propio MillaRaio, e Ariana Iglesias e Cayetana García do club filial Atletismo Noia. As mozas estarán acompañadas polos seus adestradores Anxo Lema e Laura Barbazán, así como por varios membros da directiva do club.
O desprazamento a Alcobendas conta co apoio da Deputación da Coruña e coa colaboración da empresa Addomo Arquitectura Modular, que axudan a facer posible a participación do equipo amiense nesta importante competición nacional.
