O próximo luns, 7 de outubro, o Ateneo de Santiago acollerá unha conferencia titulada “Ante a crise ecolóxica: unha defensa do decrecemento”. O evento, que terá lugar ás 19.00 h na sede de Afundación, na rúa do Vilar, será impartido por Carlos Taibo, profesor de Ciencia Política na Universidade Autónoma de Madrid, quen é un dos maiores expertos en decrecemento e teoría do colapso. A conferencia está organizada en colaboración co Grupo de Investigación en Pedagoxía Social e Educación Ambiental (SEPA-interea) da USC.
Durante a súa intervención, Taibo abordará a crise ambiental global, facendo unha crítica ao actual modelo de crecemento económico. Segundo o profesor, o decrecemento preséntase como unha solución para reducir a pegada ecolóxica e promover un estilo de vida máis sostible, en consonancia coa preservación do medio ambiente.
Taibo, autor de numerosas publicacións como ‘En defensa del decrecimiento‘ e ‘Colapso‘, defenderá a súa tese de que o sistema económico actual, centrado no crecemento continuo, resulta insostible ante o esgotamento dos recursos e a degradación do planeta. A entrada para este evento será libre ata completar a capacidade da sala.
CONCERTO DO ATENEO BARROCO
Ao finalizar a conferencia, terá lugar ás 21h, o Teatro Principal de Santiago o concerto ‘Saffo Novella: Solos e dúos de Barbara Strozzi’ dentro da sexta edición do Festival Ateneo Barroco. O grupo Dolce Rima, formado polas sopranos Laura Martínez Boj e Julieta Viñas Arjona, xunto a Xurxo Varela (viola da gamba) e Paula Brieba (tiorba), interpretará unha selección de pezas da compositora veneciana do século XVII, Barbara Strozzi.
O programa do concerto estará inspirado na aspiración de Strozzi de ser lembrada como “a nova Safo”, e explorará a intensidade emocional da súa obra. O conxunto Dolce Rima é recoñecido pola súa especialización en música antiga e pola súa traxectoria en festivais de toda Europa.
